الاثنين، 7 يونيو، 2010

الفـرح

سلام عليكم .. جالى حالة قرف من الافلام ومكنتش حابب اضيع وقتى فى مشاهدة اى افلام مصرية جديدة موش كوميدى
بالصدفة لقيت فيلم الفرح واتفرجت عليه وكمان عجبنى
من خلال مشاهدتى للفيلم وبغض النظر اساسا من ان صناعة السينما كلها حلال ولا حرام ولا ليها لازمة او ملهاش او ان اللى بيقدمه الناس دول فن او لا انا هركز على نقطة واحدة وهى ضمير المخرج والمؤلف
اللى عايز اقوله ان الفرق هنا بين مخرج ومؤلف محترم ومخرج ومؤلف معندوهمش دم ولاحياء وما اكثرهم
مثلا خالد يوسف اللى بيحسسنى ان مصر خلاص عليه العوض فيها وان خلاص مافيش خير فى الناس وان كل الصفات الحقيرة فى كل مكان وخالق جو هو حابب يتصف به وهو ان يكون مخرج له طابع خاص وشاذ وفكره ده للأسف مبيتغيرش حتى لو المؤلف اتغير يعنى مصر خلاص مافيهاش الا الشخصيات اللى هو بيقدمها مع يقيقنى بان معظم المصريين لسه زى الفل وكمان الشىء اللى بيسموه ايناس الدغيدى ربنا يدغدغها ولا بلاش .. ربنا يهديهم ويهدينا جميعاً

نيجى للفرح هنلاقى الفيلم بيحكى عن حوالى عشر شخصيات تقريبا ومبينكرش ان فيه حاجات موش كويسة بس كمان لسه فيه ناس كويسة وصفات لن تختفى مننا كمصريين زى مثلا فى الفيلم ده هنلاقى :
- ست البيت الكبيرة اللى بتقول حرام يابنى وكده عيب واقفة كحائط صد لكل غلط وبتدعى ليل نهار لولادها الست دى موجودة فى كل بيت وربنا يخليها لمصر
- لسه فيه بنات رجالة اللى يقرب منها تاكله
- لسه فيه بنات بتحب وتحترم امهاتها وبتجرى على اخواتها اليتامى
- كمان فيه العلاقة الحميمة بين الاب والابن واحترام الابن لابوه لو عمل ايه
- فيه رجالة لسه عند كلمتهم وبيحافظو على بنات الناس ومبيخلوش بيهم
- الناس لسه بتخاف من كلام الناس وبيخافوا على سمعتهم وشرفهم
- فيه ناس لما نقولها كده عيب وحرام ممكن يسمعو ويغهمو وربنا يهديهم زى
- اه كنت هنسى ان فيه زوجة الابن وحبها لام زوجها ومعاملتها بالحسنى
.. طبعا كان فيه حاجات عكس كل ده ابسطها الفرح نفسه بس يلا عمار يامصر

هناك 19 تعليقًا:

حلم بيعافر يقول...

فييييييييينك يا حج؟
واحشنى
قووووووووول ياعم اللى فى نفسك
انت زملكاوى والمفروض تفضفض
بس خالد يوسف مش وحش اوى كده
شكلى حعك وهزعلك
مش معلق قول ياعم اللى فى نفسك

فتاه من الصعيد يقول...

الفيلم بيعجبني وبشوفه كل مايتعرض ..

النماذج السيئه موجوده ... لكن في بعض المناطق الفقر ممكن يغطي على الخير لكن لا يميته

تحياتي

ليس فقيرا من يحب يقول...

السلام عليكم

ازيك يا ايهاب وازى اخبارك

يارب تكون بخير

انا بصراحه مش سمعت الفيلم

بس اصلا الدنيا هتفضل طول عمرها كده

فيها الحلو وفيها الوحش وسعات الوحش بيغلب

بس مش بينفى وجود ناس كويسه وافعال كويسه

مشكله هذا المدعو خالد يوسف والمدعوة الدغيدى

انهم بيعملو فوكس غبى قوى على حالات قد

تكون فرديه وياريت بيعملو كده

باسلوب راقى ومحترم لاءة دا الابداع

عندهم بيساوى العرى والانحطاط

وطبعا اللى يهاجم الاسلوب ده يبقى

نعامه وبيدفن راسو فى التراب ومش عايز يعترف بمشاكله و و و

بلا اقعد بالعافيه وبلاه الرغى

قلم رصاص يقول...

حبيييييييبي
شاطر بس تقولي انت فين ومبتظهرش
اديني بقالي كام يوم موجود وانت اوت سايد

المهم نيجي للبوست

انا اكتر حاجة بتزعلني الناس اللي مفروض بتشتغل في مجالات تأثيرها على الجماهير الغفيره ولا القنبله النوويه ، ومش عندها ادنى نوع من المسئوليه زي السينما والتليفزيون ووسائل الاعلام

انا كنت في فترة ما بشجع خالد يوسف لسبب واحد انه كان دايما ملازم ل وتلميذ ليوسف شاهين باعتباره كان مخرج كبير وليه بصمه كويسه اوي
لكن الفتره الاخيره فعلا الشخص دا مركز بغباء على طرح كل النماذج السيئه في مصر
صحيح الحسنه تخص والسيئة تعم بس انا ضد التركيز على السيئه من باب توعية الناس بخطرها على حياتهم.. بالعكس انا بحب اوي التركيز على الايجابيات حتى لو كانت اقليه كنوع من تشجيع الاخرين على السير على نهجها بدل مانقعد نصدر اليأس والاحباط لقلوب وعقول الناس اللي مش ناقصه اساسا

النماذج الجميله اللي انت اتكلمت عنها في اخر البوست أحترمها جدااااا وباحب اشوفها جدا وباحب اشجع وجودها في حياتنا جدا جدا

ربنا يبارك فيك

ومعدتش تتفرج على افلام تاني بقى
شوف شغلك هههههههههه

تقبل مروري وتحيتي

مرايتى يقول...

فعلا للأسف بقوا بيبنوا واقع يمكن يكون أصلا قليل جدا على إنه الوضع السائد إحنا نفسنا المصرين بنسال هو فعلا مصر بقت كده بالسوء الى بيعرضوه ده

للأسف ورينا صوره وحشه عننا لكل العالم بإدينا بدعوا الشفافيه ولأن الهدف أسمى وهو حل واقع يسبب أزمه
ربنا يسامحهم يارب ويهدينا ويهديهم

اللى موش عارف يتغير يقول...

حلم بيعافر

ازيك يا محمد
لا خالد وحش قوى وابن ستين تيت تيت
انت كنت كاتب ايه عالياهو ياد
عايز تتجوز قبلى

اللى موش عارف يتغير يقول...

فتاه من الصعيد

بس الخير موجود دايما
والنماذج السيئة الموجودة موش للدرجة دى
عموما مرحبا بك

اللى موش عارف يتغير يقول...

ليس فقيرا من يحب

الله يسلمك والحمد لله بخير
والله حاسس انى اعرفك
هههههههههههه
احسن كلمه قلتيها
انحطاط
مرحبا بك
والله يعافيك يا اختى

اللى موش عارف يتغير يقول...

قلم رصاص

حبيبى وابن حبايبى
فينك ياحبيبى فينك
موش هرد عليك لان لازم تكلمنى
هستناك

اللى موش عارف يتغير يقول...

مرايتى

ربنا يسامحهم ؟
ربنا ياخدهم ولا بلاش ربنا يهيديهم ويهدينا جميعا
مرحبا بك ومنورانى

غير معرف يقول...

ههههههههه
الفرح ده عشان الكاس اللى ضاع من الاهلى يا زملكاوى
واضحة قوى وعيب عليك
هههههههههههه

Butterfly يقول...

اكيد كل مكان وفيه الحلو والوحش
فى مصر او غيرها
وزى ما قال الرسول عليه افضل الصلاة والسلام
"الخير فى امتى الى يوم الدين"

ربنا يهدينا جميعا...

دموع القمر يقول...

مساء الخييييييير
ازيك ياايهاب
انا رجعت تانى
وطبعا لازم اسلم على حبايبى
اخبارك ايه
الفيلم دا اصلا متفرجتش عليه مش عارفة ليه مش حباه
تحياتى لك

اللى موش عارف يتغير يقول...

غير معرف
.......
عارفك يا بتاع الكاميرا المخفية
هههههههههههه
اهلى مين والناس نايمين

اللى موش عارف يتغير يقول...

Butterfly
.........
"الخير فى امتى الى يوم الدين"
فعلا وربنا يهدينا جميعا
نورتينى

اللى موش عارف يتغير يقول...

دموع القمر
..........
هلا والله هلا
ايه النور ده
بيتك ومطرحك وحمداً لله عالسلامة

ليس فقيرا من يحب يقول...

كل سنه وانت طيب يا ايهاب

رمضان كريم عليك وعلى كل حبايبك

P A S H A يقول...

كل سنة وحضرتك طيب وبألف خير وصحة وسلامة إن شاء الله

:)

رمضان كريم

غير معرف يقول...

vugldxrwyjhozlouccfk, justin bieber baby, xpzwwdk.