الخميس، 28 أكتوبر، 2010

الجنيه الجبس


الجنيه المعدنى اللى موجود الوقتى بصراحة حاجة تكسف عندى احساس ان هو بريزه موش جنيه وده خلانى افتكر معلومة سمعتها وهى ان الجنيه المصرى كان بيساوى جنيه دهب !!! اه جنيه دهب
ببساطة بدأ الجنيه العملة الرسمية لمصر في 1899م وكان الجنيه المصرى عملة من المعدن الذهبي ولذلك كان الجنيه بقيمته مهما ارتفع السوق أو هبط
جت فكرة حفظ النقود بأن يودع الشخص نقوده الذهبية في البنك ويأخذ بها إيصال وترد القيمة المودعة في البنك لحامل الايصال فأصبح الناس يتداولون بالايصال وإذا أراد حامل الايصال في يوم من الأيام الحصول على أمواله الحقيقية فله الحق في أن يستردها من البنك بموجب هذا الإيصال اللى هو الجنيه
كان وزن الجنيه الذهب ثمانية جرامات وهو الجنيه الذهب المعروف حاليا في سوق الذهب المصري يعنى الجرام كان بـ 12.5 قرش ياسلام عالدنيا
واستخدم هذا المعيار حتى الحرب العالمية الاولى 1914 م حيث تم ربط الجنيه المصري بالجنيه الاسترلينى حيث كان الجنيه الاسترليني = 0.975 جنيها مصرياً
الى عام 1962 م حيث تم ربط الجنيه بالدولار الامريكى عند سعر 2.3 دولاراً لكل جنيه مصري ومن يومها الاية اتقلبت والدولار وصل قيمته 1 دولار لكل 7 جنيه مصرى وده من 4 سنوات تقريباً
اخوانا السعوديين والشاميين بيقولوا عالفلوس "مصارى" وده لان الجنيه والعملات المصرية كانت هى العملة المتداولة وخصوصا بعد الحرب العالمية الاولى فى الشام والحجاز وطبعا السودان
وده عادى جدا لان العملة المصرية هى اول اوراق النقد العربى كطبيعة مصر فى الوقت ده بانها كانت متقدمة فى اى وفى كل شىء ودايما كل ماهو جديد تلاقيه فى القاهرة رابع اجمل مدينة فى العالم فى الوقت ده وطبعا كعادتنا بنبكى على اطلال الماضى انا بصراحة هصرخ واعيط عالماضى
كلمات من زمن فات
الجنيه : كلمة إنجليزية Guinea لعملة إنجلترا منذ أربعمائة عام مضت
القرش : عملة الدولة العثمانية و100 قرش يساوى 1 جنيه
مليم : وهو وحدة قياس عددية باللغة الفرنسية Millieme و10 مليمات يساوى 1 قرش
نِكْلَة : Nickel وتوازي مليمان، وكان يساوي النيكل البريطاني
تعريفة : Tarrif وتوازي خمس مليمات، وهي تسمية انجليزية
شِلِن : Shilling ويوازي خمسة قروش، وكان يساوي الشلن البريطاني
بريزة : توازي عشرة قروش وسمين بذلك كونها صنعت فى باريس
ريال : ويوازي عشرون قرشاً، وكان يساوي تقريباً الريال السعودي طبعا زماااااان
سحتوت : يقال كان عمله رغم ان هو اسم واحد حبيبى ههههه


الاثنين، 7 يونيو، 2010

الفـرح

سلام عليكم .. جالى حالة قرف من الافلام ومكنتش حابب اضيع وقتى فى مشاهدة اى افلام مصرية جديدة موش كوميدى
بالصدفة لقيت فيلم الفرح واتفرجت عليه وكمان عجبنى
من خلال مشاهدتى للفيلم وبغض النظر اساسا من ان صناعة السينما كلها حلال ولا حرام ولا ليها لازمة او ملهاش او ان اللى بيقدمه الناس دول فن او لا انا هركز على نقطة واحدة وهى ضمير المخرج والمؤلف
اللى عايز اقوله ان الفرق هنا بين مخرج ومؤلف محترم ومخرج ومؤلف معندوهمش دم ولاحياء وما اكثرهم
مثلا خالد يوسف اللى بيحسسنى ان مصر خلاص عليه العوض فيها وان خلاص مافيش خير فى الناس وان كل الصفات الحقيرة فى كل مكان وخالق جو هو حابب يتصف به وهو ان يكون مخرج له طابع خاص وشاذ وفكره ده للأسف مبيتغيرش حتى لو المؤلف اتغير يعنى مصر خلاص مافيهاش الا الشخصيات اللى هو بيقدمها مع يقيقنى بان معظم المصريين لسه زى الفل وكمان الشىء اللى بيسموه ايناس الدغيدى ربنا يدغدغها ولا بلاش .. ربنا يهديهم ويهدينا جميعاً

نيجى للفرح هنلاقى الفيلم بيحكى عن حوالى عشر شخصيات تقريبا ومبينكرش ان فيه حاجات موش كويسة بس كمان لسه فيه ناس كويسة وصفات لن تختفى مننا كمصريين زى مثلا فى الفيلم ده هنلاقى :
- ست البيت الكبيرة اللى بتقول حرام يابنى وكده عيب واقفة كحائط صد لكل غلط وبتدعى ليل نهار لولادها الست دى موجودة فى كل بيت وربنا يخليها لمصر
- لسه فيه بنات رجالة اللى يقرب منها تاكله
- لسه فيه بنات بتحب وتحترم امهاتها وبتجرى على اخواتها اليتامى
- كمان فيه العلاقة الحميمة بين الاب والابن واحترام الابن لابوه لو عمل ايه
- فيه رجالة لسه عند كلمتهم وبيحافظو على بنات الناس ومبيخلوش بيهم
- الناس لسه بتخاف من كلام الناس وبيخافوا على سمعتهم وشرفهم
- فيه ناس لما نقولها كده عيب وحرام ممكن يسمعو ويغهمو وربنا يهديهم زى
- اه كنت هنسى ان فيه زوجة الابن وحبها لام زوجها ومعاملتها بالحسنى
.. طبعا كان فيه حاجات عكس كل ده ابسطها الفرح نفسه بس يلا عمار يامصر

الأربعاء، 7 أبريل، 2010

أهـل الكـهـف


من فترة وانا مشغول عشان كده انا بعتذر دا لو فيه حد واخد باله اساسا
عموما .. تحياتى للجميع

احسن تعليق سمعته من فترة طويلة من مهندس سودانى بيقول ان ياريت كان من اصحاب الكهف بس هو ركز فى امنيته دى على انه محتاج ينام كتير وان هو يشوف بعد 300 سنة الوضع هيكون ازاى

- انا معاه فى موضوع النوم ده جدا لان كلامه كان فى فترة كنت فيها مشغول ومضغوط وموش بنام كويس بس موش لدرجة انى محتاج الفترة دى كلها
- امنيته التانية ان هو يشوف الوضع بعد اكتر من 300 سنة هيكون ازاى فكرة بالنسبة ليه مقبولة وفيها نوع من الاثارة واعتقد ان الجميع ممكن يفكر فى كده
- انا احب اضيف واقول ان ربنا قال (إنهم فتية آمنوا بربهم وزدناهم هدى) يعنى ماشاء الله مؤمنين وكمان ربنا بيشيد بيهم وزادهم ايماناً
- وكمان ان هم كانوا صحبة مؤمنة
- حظوا بان سورة كريمة فى القرآن الكريم هى سورة الكهف
- واخيرا ان يكون الله حافظهم وهو خير الحافظين لاكثر من 300 سنة
... ايه رأيكم فى الكلام ده ؟

السبت، 13 فبراير، 2010

الى مجهول


انه الاخلاص والحب
شوف فى قمة نجاحك ممكن تقول ايه للى وقف جنبك عندما تخلى عنك الجميع .. دى الترجمة


لقد كنت دائماً أثق بالأرقام
المعادلات و المنطق..
الذى يفضى إلى سبب
لكن بعد هذا العمر من هذه المطاردات
تسائلت !!
ما هو المنطق بحق ؟
من الذى يحدد السبب ؟
أخذنى سؤالى خلال الظواهر
الفلسفيات
الأوهام
ثم عدت من حيث بدأت
وعملت أكبر إنجاز فى تاريخى المهنى
أهم إكتشاف فى حياتى
أنه فقط فى المعادلات الغامضة فى الحب
حيث لا وجود للأسباب المنطقية
أنا هنا الليلة بسببك أنت وحدك
أنت السبب فيما أكون
أنت جميع أسبابى
شكراً لك

------------------ بعيدا عن الجو الرومانسى ده -------------------
* احنا اسفين يا أهلى .. اذا كان جدو بطلا فلن يكون زملكاويا
* الاهلى استعان بعفروتو .. حتى العفاريت فى خدمة الأهلى

الأربعاء، 3 فبراير، 2010

مـصـر الـتـى


- بقالى فترة مشغول جدا بس كان واجب عليه اقول حاجة عن فوز مصر

اللى حصل ده موش انجاز رياضى بس ده انتصار واثبات ان مصر والمصريين شىء عظيم
اللى زيى كده بره مصر بيشوف الامور بمنظور مختلف يعنى فيه اخوان عرب بيشجعوا مصر واخوان اخرين برده عرب مبيشجعوش مصر وبيكون فيه تحدى
الكورة خلتنى اقول باعلى صوت انا مصرى يارب الاقى كل حاجة فى مصر تخلينى اقول دى مصرية وانا مصرى
شمال يمين احنا المصريين .. فعلا الواحد فخور كونه مصرى
وكمصرى بشكر حسن شحاته ووائل جمعه واحمد فتحى والحضرى والبديل المخلص عبد الواحد السيد وطبعا جدو وباقى اللاعبين بس دول كنت حاسس ا
ن هم مخلين لاقصى درجة
- موش عارف ليه لم يعد لدى الرغبة فى كتابة موضوعات جديدة اعتقد ان اهم سبب انى مقتنع ان مدونات الفيس بوك هتقضى عالمدونات العادية
عموما انا دخلت النهاردة عشان اسلم عالجميع واتواصل مع حبيايبى
- فيه مجموعة افلام مصرية جديدة بجد حاجة تكسف وللاسف الغير مصريين بيفكروا ان دى مصر وده اللى موجود واللى بيحصل بالفعل
يعنى صورة مصر الاخلاقية والحضارية بيمثلها بره افلام خالد يوسف الهابطة ومجموعة ممثلين فاشلين مبيعرفوش يعملوا غير كده
- امبارح والنهاردة وبكرة وكل يوم بشتاق وبحب مصر
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الأربعاء، 6 يناير، 2010

كلام × كلام ... الجزء الثانى

اللى مالوش خير فى حاتم مالوش خير فى مصر
خالد صالح هى فوضى
طول ما ده تفكيرك عمرك ماهتوصل .. محمد بديع
يعنى ايه كلمة وطن ؟ .. محمد فؤاد
الحلو حلو لو حظه على قده وابن الاصول ينعرف ماهما الزمان هده
على المنشاوى
في المثلث القائم الزاوية يكون مربع طول الوتر مساويا مجموع مربعي طولي ساقيه .. نظرية فيثاغورس
متخافش يابنى هيكسب
جدى رغم ان الزمالك اتغلب والماتش خلص
يابنى وطى عالمذيع ده هو اللى لابخ اللعيبة .. جدى تانى
شعبى يقول عليه ايه ؟ متواطىء معاكم ؟
احمد زكى ايام السادات
البيت ده طول عمره طاهر وهيفضل مطاهر
كوريا عسكر فى المعسكر
انت عرة افريقيا وبولندا .. السيدعبدالرازق
الراجل موش بس بكلمته الراجل برعايته لبيته واسرنه
احمد ماهر اعلانات وزارة الصحة
اعمل ايه فى الوحدة وانت مش هنا ؟ .. انغـام
بسمع اسمك بدمع .. أليـسا
فيه ايه ؟ .. لا مافيش دا حساب رز قديم حته مصرى أصلى
مدرسة صفا ; مدرسة انتباه ; التمرين الاول ابتدى طابور المدرسة
دى بقى شوية جمل معلقة معايا من الافلام
ماشى يابنى ادمين
كبر الجى وروق الدى
الليلة يا عمدة .. اللى يعرف اللى قالها مين يبقى كده
يارتنى عرفتك قبل ما كل ده يحصل
هى كل الناس عايزين يبقوا فتوات ولا ايه ؟ امال مين اللى هيتضرب؟ الدقن
الليله فرح والعريس هيتجوز ومدام العريس هيتجوز تبقي العروسه هتتجوز
عاش البحر الاحمر المتوسط ابن حميدو مراسم تسليم العبارة نورماندى
كلما مـال قـرص الشـمس الـى المغيب بين الاطـلال اذكـريني
تسمحيلى بالرقصة دى؟ طب ما ترقص يا خويا هو فى حد حايشك !!