الاثنين، 7 ديسمبر 2009

حسام حسن


..لهذه الاسباب انا متاكد من نجاح حسام حسن..

اولا عشان الكليب اللى فوق ده يكفى
ثانيا انا كنت مع تولى حسام حسن تدريب الزمالك وهو لسه بيلعب فى صفوف الزمالك وكانت هتبقى سابقة
ثالثا لان حسام كفء وانا واثق من ده وكمان ابراهيم اضافة فنية لحسام
رابعا اللى بيدافع عن الزمالك هو جمهوره الوفى فقط عكس الاهلى اللى الدنيا كلها .. تيت تيت .. حسام وابراهيم هيكونوا حائط صد لاى ظلم من اللى بيتعرض ليه الزمالك فى السنوات الاخيرة
خامسا حسام هيخلق روح جديدة لان لو نص الفريق بس اتأثر بحسام وحماسه ده يكفى الزمالك للعودة من بعيد
سادسا علاقات حسام هتخلصلنا صفقات كنا بنفشل فيها
سابعا مدرب شاب واحنا محتاجين واحد عنده طموح موش جاى ينهى تاريخة عندنا
ثامنا
حسام من عينة مدربين انا نفسى بفضلهم امثال مورينيو ومارادونا (مغامرين)
تاسعا حسام وابراهيم هيكونو بمثابة طبيب نفسى للاعبين الزمالك
عاشرا حسام هيدرب وابراهيم هيضرب اى حد ييجى عالزمالك

هناك 41 تعليقًا:

خواطر شابة يقول...

هو بس لو يتحكم في اعصابه أكيد حينجح بس عصبيته الزائدة دي مشكلة

حنين يقول...

السلام عليكم
ياتري المدونه بتسمح بتعليقات الاهلويه
طيب شكرا
انا اهلويه بس بحب الزمالك جدا واياريت حسام يدرب الزمالك اكيد هتفرق كثير
مع تحياتى وادعوك لزياره مدونتى انا باسمح لدخول الزمالكاويه عادى انا روحى رياضيه

قلم رصاص يقول...


ازيك ياحبيب هارتي

اولا عاوز أأكد لك على حقيقة مفادها
اني اتمنى رجوع الزمالك للساحه بقوة
لأن ده بيخدم الدوري وبيخدم الأهلي برضه اللي انا باشجعه .. بيخدمه لأن الاهلي لما يكسب فرق بحجم الزمالك وتاريخه اللي عمالين تردحوا بيه ههههه .. ده يبقى حاجة تشرف الأهلي بدون مجاملة يعني ..

واتمنى بأمانة التوفيق لحسام لأني طول عمري مؤمن بامكانياته اللي انت واحد من الناس طوووووول عمرك بتشكك فيها ومتقدرش تنكر والا تبقى بجد عيل ..!

دي نقطة

المسألة مش تعصب ولاتشجيع اعمى واهبل
لما الواحد يبقى بيحب واحد عشان مهارته او دماغه او او حسب المكان اللي هو فيه .. يعني انا بحب حسام وهو في الاهلي وبرضه فضلت احبه لما راح الزمالك وهافضل احبه دايما.....

انما انت طول عمرك بتشكك في حسام وامكانياته وانه ولا حاجة ايام ماكان في قمة مجده وهو في الاهلي ..يمكن ده بسبب تعصبك للزمالك الله اعلم ..لكن انا طوووووووول عمري رغم اني اهلاوي
بحب حااااازم امام كمثال يعني وبقدر امكانياته الفنيه وهو زملكاوي ابن زملكاوي ..

شوفت الفرق بيني وبينك ازاي؟!

ولما حسام اللي مبيعرفش حاجة ده انتقل للزمالك غيرت رأيك وحولت حسام لبطل .. لسبب وحييييييد مفيش غيره وهو التعصب الاعمى والمنافسه الغير منطقية اللي مفروض تكون كروية بين الاهلي والزمالك وسيادتك ومعظم المحسوبين على جماهير الزمالك والأهلي حولتوها بقدرة قادر لحرب .. ربنا يشفي يابني!

دا الوحيد اللي انت شجعته من الاهلي وقولت عليه من احسن لاعبي مصر وهو محمد ابو تريكه .. لما بقيت اغيظك شوية بقيت تغير رأيك فيه .. زائد اني عارف كويس انت شجعته ليه ياعم ايهاب ..عشان بس الدنيا كلها بتقول عليه الراجل ده فعلا كويس .. وكمان عشان مش هتقدر تبقى ضد التيار خصوصا ان الزمالك كان ومازال في الفترة دي منهار .............!

انا بجد زعلان من ردك اللي فات
عااااااااااااااارف ليه ؟

لأنك بتقارن لي موقف بعض الاهلاوية من طارق السعيد بموقفك من حسام حسن ..لالالالا والف لا .. انا زعلت من اني اقصد رأينا انا وانت وبس .. لاننا عارفين الى حد ما موقفنا جدا من المسألة دي .. مليش دعوة بقى بغيري وغيرك ..

فاهمني يابني ولا لسه ؟

هههههههههههههههه

عموما انا باتمنى التوفيق من كل قلبي لحسام حسن .. وياريت يقدر يعمل حاجة
قبل ما الزمالك ينزل للمظاليم ..!!!

هههههههههههههههههههه
هههههههههههههههههههه
هههههههههههههههههههه


واهم حاجة بس المباراة تمشي كويس
ومنضحكش علينا الدول التانية زي الجزائر مثلا ....!

يلا في حفظ الله

قلم رصاص يقول...


والله انا كارمكم بس عشان خاطر السيد
اخوك هههههههههههههههههه

دا اهلاوي أصييييييييل

هههههههههههههههه

في امان الله

غير معرف يقول...

الغريب مسكين محيلتوش اى حاجة

جميل روح الامل التى تتحلى بها ولاصرارعلى النهوض وفوقان الزمالك ولكن هل حسام فعلا يملك كل ما اشرت اليه بالدرجة المطلوبة؟وهل كل الظروف والعناصر الحالية تسطيع تحقيق طموحات الزملكاوية؟
ده مجرد سؤال..............
فيه مبدأ تسويقى أن الهدف المنشود بيكون SMART الكلمة معناها الحرفى ذكى ولكن الكلمة اختصار حيث كل رف يعبر عن كلمة
S (specific- 1 اى الهدف محدد ومعين بمعنى انتو جبتوا حسام ليه؟
2 M Measurable اى يمكن قياسه فى حالتنا بالنقاطوالبطولات
3-A Acheivable
اى يمكن تحقيقه فى ظل المكانات المتاحة حاليا من لاعبين وادارة وجهاز فنى الخ ...................
4-R Real
اى حقيقى او واقعى يعنى مثلا منقولش الزمالك ياخذ دورى اطال اوروبا
5-T Time
الوقت بمعنى ربط الاهداف بعنصر الزمن
يعنى الزمالك ياخذ مثلا 10 نقاط من 4 ماتشات الجاية او ياخد الدورى فى الموسم الجاى

حلم بيعافر يقول...

ولا هيتغير اى شىء عن السنة اللى فاتت
الزمالك هيشد حيله شوية مع حسام حسن
وهيكسبله مام ماتش ورا بعض
وبعدين يتكتب فى الجرايد غعودة الروح للزمالك وممكن نوصل لنهائى كاس مصر ونقابل الاهلى ونتغلب
وبعدين مجلس الادارة يقول حسام حسن مدرب مؤقت ونروح نجيب حد من اللى احنا مشيناهم قبل كده زى فينجادا
او ممكن حد من الناس اللى تشل جوه النادى يقولك احنا عايزين مدرب من ولاد النادى
وبعدين نبدا السنة الجديدة زى الزفت ونغير المدرب وهكذا
هى الحيالة كده يابنى
متياسش وبرضه ميبقاش عندك امل انك تكسب الاهلى وتاخد الدورى
العيب فى الزمالك ادارى بحت
والدليل على كده هو نجاح فرق اليد والسلة والالعاب التانية لان مجلس الادارة مطنشها شوية والاعلام مش مركز عليها برضه
خلى بالك من نفسك يابنى وبطل الزمالك ده بقى

اللى موش عارف يتغير يقول...

خواطر شابة
هيتحكم فى اعصابة
وربنا يهدى
ممكن تكون عصبيتة الزايدة ميزة
هنشوف

اللى موش عارف يتغير يقول...

حنين
شكرا على شعورك الطيب
انا كل حبايبى اهلاوية على فكرة
بس هعمل ايه بقى القلب ومايريد
شكرا عالزيارة وان شاء الله هجيب كيلو برتقال واجى ازورك فى مدونتك

اللى موش عارف يتغير يقول...

قلم رصاص
الكتابة فى الموضوع ده بتتعبنى
عايز اكلمك ابقى كلمنى افضل عشان اعرف ادافع عن رايى
لانى غير مقتنع نهائيا بكلام حضرتك
كلمنى ... شكرا

اللى موش عارف يتغير يقول...

قلم رصاص

لو السيد اخوية بقى اهلاوى هرجع اقطع رقبتة
قال اهلاوى قال هى ناقصة
كلمة اهلاوى بتقترن بكثير من الصفات الـ تيت تيت
ههههههههه

اللى موش عارف يتغير يقول...

غير معروف
عاصم بيه المتولى حبيبى
والله كلامك جميل وموزون وغالى
ان شاء الله ربنا هيكرم حسام
وبعدين حسام موش لوحدة معاه ابراهيم وعبد الحليم على
انا متفائل يا دكتور

اللى موش عارف يتغير يقول...

حلم بيعافر

ثق فى كلامى
اوعدك ان حسام هينجح
هو بس لو يتعاقدوا معاه لفترة اطول بحيث اللعيبة تعرف ان مافيش الا هو يقومو يركزو معاه شوية
ان شاء الله حسام هينجح

غير معرف يقول...

بص ياعم اللي مش عارف تتغير
بتنسي بسرعه ليه بتنسي أرائك في الناس كل يوم برأي ولا ماشي مع الموجه وخلاص نسيت رأيك في حسام علي رأي قلم رصاص حتي من المدهش ياعم قلم رصاص بيشكك في ابو تريكه كمان والله وقال كلام علي ابو تريكه بلاش اقوله عمنا اللي مش عارف يتغير متعصب للزمالك وخلاص عارف لو فيه ناس بدأت تبطل تشجيع الزمالك وشجعت اي فريق تاني ايهاب هيمشي معاها من الاخر اتقف معاك في النقطه تاسعاً ان حسام طبيب نفسي بس مش هيطول وعاشراً ان ابراهيم هيضرب فقط والزمالك ان شاء الله مش هينزل درجه تانيه رغم كيد الحاقيدين ونشكر الدكتور عاصم المتولي علي رأيه العلمي المتفتح .

مع خالص تحياتي بالتوفيق إبراهيم بكر شحاته

اللى موش عارف يتغير يقول...

عم عيالى ابراهيم بكر
يعنى اخوية

طبعا برحب بحضرتك وده حدث تاريخى بدخول شخصية كبيرة زى سيادتك لمدونتى المتواضعة واحنا اسفين عالخمس دقايق اللى ضيعناهم من وقتك الثمين
عايز اقولك على كام حاجة كدة
1-الاهلى موش محتاج لجمهورة
2-هو انت كان رايى فى حسام ايه قبل كده هو انا من يوم ماجالى الشرف وعرفتك وحسام فى الزمالك
3-هو ابوتريكة ده ابوالهول يعنى ولا معصوم وايه يعنى اما اغلط فيه زيه زى اى لاعب عادى هنهرج
بقى خلاص منزل من السما بيلعب ليه اثناء الصلاة وبيمثل ليه عشان ياخد ضربات جزاء والماتش اللى خلى الاهلى يلعب ماتش فيصل مع الاسماعيلى السنة اللى فاتت زق الواد وجاب جون مرحش ليه للحكم وقاله دا غير اساسا ان الكورة وفلوسها فيها شك
4-انا لست زملكاويا بقدر كرهى للاهلى كمنظومة من وجهة نظرى حقيرة
5-وموش هننزل درجة تانية وربنا هيكرم مع حسام
6-بضم صوتى لصوت سعادتك واشكر الدكتور عاصم
7-يا اخى حرام والله اللى بيحصل للزمالك والزملكاوية ده يعنى انا مبصعبش عليك
ههههههههههه

اللى موش عارف يتغير يقول...

نقطة لازم اوضحها

معظم حبايبى اهلاوية
معظم حبايبى اهلاوية
معظم حبايبى اهلاوية
معظم حبايبى اهلاوية
معظم حبايبى اهلاوية
معظم حبايبى اهلاوية

وعلى راى الاستاذ سعد
... الاهلى فى كل حته
... عمال يجيب اجوان

قلم رصاص يقول...


طول عمرك تقول الكلام وترجع فيه

نفسي تعقل بقى بجد

وانا شخصيا طول عمري بحب ناس كتيره من

لاعبي الزمالك سواء القدامى ام الحاليين

اهمهم حازم طول عمري بحبه لاعب وانسان

عنده اخلاق عاليه

انما اللي يغيظ بجد انك طول عمرك

معايا انا بالذات وانت متأكد اني

بقول كلام صح .. طول عمرك معايا

بتقول ان حشام عمره ماكان لاعب كورة

ابداااا ولابيعرف حاجة ومحظوظ و و و

دلوقتي عملت حسام قديس..طبعا دي حاجة

بتفرحني كأهلاوي .. لأن حسام ابن الاهلي

واتربى ولحك اكتافه من الاهلي زي

ماحازم والغندور وغيرهم اتربوا في الزمالك ..فاااااااهم ولا لسه كالعادة .. ؟

متبوصليش كده .. انطق !

ههههههههههههههههههههه


متعيطش متعطيش .. وابقى شوف رأي
محمد التميمي اللي انا كنت باقول متعصب اوي عنك بمراحل شوف بيقول ايه
وشهد شاهد من اهلها يعني.

ورغم ذلك انا بجد نفسي الزمالك يرجع تاني زي الاول واحسن عشان بجد يا ايهاب والله من زمااااااان اوي مش حاسس بطعم الكورة في ظل غياب المنافسه بين الاهلي والزمالك!

ووالله لو الزمالك غلب الاهلي ماهزعل بأمانه ..بس اهم حاجة الزمالك يرجع لسابق عهده

بس

يلا روح اتفرج ع الماتش

سلام

الشعب لابد له من حكومه تشكمه يقول...

مرضيتش ارد على البوست ده غير بعد الماتش,
خساره تعادل ههههههههههههههه..
بس كان ماتش باااايخ...

بس برضه هتتغلبوا جبتو حسام جبتو الجوهرى جبتو حتى مدرب برشلونه مفيش فايده.
العيب مش فى المدرب على فكره العيب فى الاااااااعيبه..

عاجبنى عاشرا اوى فعلااا هى دى الحقيقه دا دور ابراهيم من وقت مكان لاعب:)

بس على فكره حسام عصبى اوى زى ابراهيم واعتقد انهم هيعملوا مشاكل برضه...

اللى موش عارف يتغير يقول...

قلم رصاص

ياعم الحاج لعيبة الاهلى هم لعيبة الزمالك بدليل الاسماء دى :
حسام حسن ابرهيم حسن مجدى طلبة رضا عبدالعال جمال عبد الحميد ابراهيم سعيد اسلام الشاطر اينو العجيزى حسن مصطفى طارق السعيد محمد عبد الله كل دول لعيبه لعبو للزمالك والاهلى ولاندية اخرى وكمان فيه غيرهم يبقى هتقولى انى بميل لحد ليه
انا طبعا لازم اشجع اللاعب اللى فى النادى بتاعى واجى شوية على اللى فى الاندية المنافسه ده طبيعى وده سلوك جميع مشجعين العالم واسال مشجعين برشلونة عن فيجو لما سابهم وراح ريال مدريد
هى كده.. يعنى انا موش لوحدى ولا بغير رايى ده سلوك منتشر
انا معترض ان حسام ابن الاهلى خلاص الاهلى باعه دا حسام لم توجه له الدعوه لحضور احتفالية الاهلى بالمئوية بتاعته ومينفعش اجى اقول اينو ابن نادى الزمالك لان هو باع النادى اللاعب ابن النادى اللى يحافظ عليه ويسانده زى رضا عبدالعال بالظبط طول عمره زملكاوى بس نهى حياته فى الاهلى وبيحسب على الاهلى حاليا وزيه مجدى طلبه والعكس حساموابراهيم

اللى موش عارف يتغير يقول...

الشعب لابد له من حكومه تشكمه

انا موش معاكى خالص
لان خلاص زمن الـــ انتهى
من هنا ورايح هتاخدو فوق دماغكم
صدقينى
وعصبية حسام مطلوبة جدا جدا
لان وصالحال بلاعبين الزمالك لقمة البرود
نورتينى يا بنت بلدى
.

Remas يقول...

الاول ازيك واخبارك ايه

اللى بعد كدا بئا انا موافقة عليه كله وان شاء الله حسام حسن يقدر يعمل حاجة

وانا متفائلة بيه جدا

هو مش في مدونين زملكاويين غيرى انا وانت ولا ايه ؟

الشعب لابد له من حكومه تشكمه يقول...

اى نعم ياريم الزمالكاويه دول انقرضوا من زمااااااااان..وفى بيتعالجوا دلوقتى:)

حظك يا ابن بلدى ان الماتش طلع تعادل,كنت هتتقطع بس خساااااااره,
يلا مش مشكله,
دلوقتى بتفرحوا بالتعادل وحلم حياتكو التعادل:))
ياعيييينى ليك حق بعد بنى عبيد والشرطه والحرس ,لما تتعادلوا مع الاهلى يباه كده كسبتو كاس العالم..

ال زمن الـ انتهى ال.. اباه قابلنى على راى الاخت روبى..

بالمناسبه صحيح كنت فى فرح يوم الاتنين يعنى قبل الماتش بيوم والعريس زملكاوى اصحابه مسكوه فى وسط الفرح بيب بيب اهلى,,
كان هيعيط وبتاع الدى جى شغله اوعى يجيلك متعب:))
راح مسك المايك ووقف يقول زمااااااااليييييك,زمااااااااااليك ويستنى حد يرد محدش رد,كان شكله وحييييييييييييييييييييش:)

قلم رصاص يقول...


هههههههههههههههههههههههههه

هموت هموت خلاص من الضحك مش قادر يابني

انا معاك من حيث الانتماء والتشجيع انك تتأزر نفسيا مع ناديك اللي بتشجعه

لكن يابني افهم مُرادي مرة واحدة في حياتك بدون ماتلف وتدور كالعادة.......

انا قصدي انك مشكك في الراجل طول عمرك فنيا وانه ميعرفش يعني ايه كرة قدم ..

عكس ابوتريكه تماما اللي انت ياما أثنيت عليه وقولت انه احسن لاعب في مثر .. لأ وايه .. في عز تدهور حالة الزمالك .. يعني في الفترة اللي مفروض يكون عندك كزملكاوي كل أسباب الحقد والكره للأهلي .. فاهمني ؟!

ياعم شغل بقى ههههههههههههههههه

واحشني ياتيييييييت افريقيا هههههههه

هتتعوض والله وتحاولوا تعملوا حاجة مع جرجير بني سويف هههههههههههههههه

في امان الله

اللى موش عارف يتغير يقول...

reem

ازيك يا ربم ؟
انا الحمد لله
يكفينى انك زملكاوية
طول عمرى اقول ان الزملكاوية هم الصفوة وكونك زملكاوية ده تاكيد على كلامى
بس برده فى اهلاوية ميه ميه يعنى
عشان حبايبى ميزعلوش

تفائلى حسام هيرجع مدرسة الفن تانى
.

اللى موش عارف يتغير يقول...

الشعب لابد له من حكومه تشكمه

انقرضوا .. ما هو طبعا احنا ديناصورات
والله انتو يابتوع المنصورة
.
بتروحى افراح الزملكاوية ليه؟
وبعدين العريس اللى غلطان لانه ملبس العروسه ابيض فى ابيض المفروض يعمل خطين حمر
لان الخطين الحمر دول سياسة زملكاوية عليه عشان اخوانا الحمر
.

اللى موش عارف يتغير يقول...

قلم رصاص

انت تعبتنى
واضح ان الاهلاوية بيهدو على بعض
وعشان تكونو مستعدين
هتاخدو على دماغكم من هنا ورايح
ويمكن قفاكم كمان ركزو لا هتمومو
هتموتى ياسوسو ..
.

قلم رصاص يقول...


هههههههههههههههه

ربنا يشفيك

وان شاء الله تكسبوا الماتش الجاي مع كبريت حلوان

ههههههههههههههه

حنين يقول...

شكرا على الزياره
انا كمان قلت اجى
ابارك على الروح الطيبه
اللى كانت موجوده فى المباره
وبجد مش مهم مين يكسب كلنا مصرين
بس لو الاهلى كسب كنا هنبقى برضه
مبسوطين طبعا
تحياتى حنين

♥نبع الغرام♥♪≈ يقول...

السلام عليكم

ازيك اخبارك اية

جيت اسلم بس بصراحه ماليش فى الكورة

المهم اننا من المنزلة وبلدياااااااات ودا الاهم

ربنا يسعدك يارب وابقا طمنى عليك
المهم قولى انت من المنزلة نفسها ولا فين بالظبط من ضواحيها

مستنية تعرفنى

يلا سلام
وخلى بالك من نفسك

ايناس

micheal يقول...

طب يعني أنت من حقك تشجع فريقك وتتمناله الفوز والتوفيق مع حسام حسن..ايه لزمة التريقة ع الأهلي خصوصا أنه لا ينافس الزمالك الموسم ده؟؟؟؟؟؟؟؟؟؟؟؟

اللى موش عارف يتغير يقول...

حنين

شكرا عالشعور الطيب ده
والروح الرياية العالية دى
وكنت اتمنى فوز الزمالك

اللى موش عارف يتغير يقول...

إبتسامة ملاك

انا الحمد لله
انت اللى ازى اخبارك ؟
انت من المنزلة والله كويس
انا من ضواحيها
وشكرا على اهتمامك
.

اللى موش عارف يتغير يقول...

micheal

ياعم اهو كلام
هو فيه زى الاهلى وحالاوته

مدونون من اجل الاقصي يقول...

السلام عليكم
بصراحة مليش فالكورة
بس حبيت
ارد السلام

mimi يقول...

طول ما بتقول علي الأهلي تيت تيت

عمرك ما هتتغير

ومتنساش ، حسام وابراهيم زمان كانوا أهلاوية

اللى موش عارف يتغير يقول...

مدونون من اجل الاقصى

والله ميزة ان ملكش فى الكورة
عموما مرحب بيك
البيت بيتك

اللى موش عارف يتغير يقول...

mimi

تيت تيت اهلى
تيت تيت اهلى
هههههههههههه
ولا يهمك

Remas يقول...

ازيك يا باشا

جيت اسلم عليك

انت فين ؟

مختفي ليه كدا

تحياتى

اللى موش عارف يتغير يقول...

reem

الله يسلمك
موجود
واهلا بيك
نورتينى
.

طهر فؤادك يقول...

شاركونى ياأحبائى فى حملة " اكفلة وهيدخلك الجنة " ,,,

اللى موش عارف يتغير يقول...

طهر فؤادك

ان شاء الله نشاركك

بقايا انسانه يقول...

فعلا كان كلامك صح

حسام عنده طاقه معنويه رهيبه

واصرار وعزيمه مفيش بعد كدا

دا كله الى جانب انه فاهم كوره

وله علاقات جامده مع اللاعيبه

والكل يتمنى يلعب تحت قيادتو