السبت، 13 يونيو 2009

A Beautiful Mind

فيلم من افضل ماقدمته السينما الامريكية وهو للرائع راسل كرو والفيلم انتاج 2001 وبيحكى عن قصة بروفيسور رياضيات عبقرى يتعرض لمرض نفسى يجعل الجميع يتخلى عنه عدا زوجته الوفيه لكنه بالاصرار ومساعدة زوجته يقاوم حتى ينجح ويحصل على جائزة نوبل
اللى وقفت عنده فى الفيلم ده بعيد عن الاداء المزهل لنجوم الفيلم والاخراج والقصة اربع حاجات:
واحد ازاى ان الانسان له عقل لازم يستغله ويحاول يبنى نجاحه من خلاله وبالاخص لو يمتلك موهبة
اتنين لو فيه عقبات فى طريقك ازاى تقدر باصرار تتخلص منها وبالذات لو مرض وكمان نفسى
تلاته ده بقى اهم شىء عندى " الحب " الفيلم ده فيه قصة حب ووفاء رهيبة ياسلام لو الواحد ربنا يكرمه بواحدة زى دى يبقى شكرا
اربعه الفيلم حرك كمية مشاعر وحاجات كده موش قادر اشرحها وتحس ان الفيلم موجه اليك بيقولك قوم كفاية نوم حس بقى واعمل حاجه انت عندك كتير ممكن تقدمه يبقى تنام ليه

هناك 12 تعليقًا:

قلب ارهقته الاحلام يقول...

هو بصراحة انا شفته من زمان بس الزهايمر بأة :)

اما عن الاربع حاجات ال انت اثرتهم

فأنت فعلا عندك حق الانسان لما تكون عنده الموهبه مش لازم اي حاجه ف الدنيا توقفه

لازم يحاول بكل ما اوتي من قوة أنه يثقل الموهبه دي ويوصل بيها

او هي هتوصل بيه ف النهايه اكيد

اما عن اهم حاجه عندك :)

فشيئ اكيد ان اجمل حاجه ف الدنيا دي هي الوفاء والاخلاص للحبيب ولو حتي بالفكر مش افعال وبس ولا كلام وبس

واهم حاجه يكون فيه تقدير من كل طرف واحترام للآخر متهيألي لو ده موجود....

واكيد فيه ناس كده كتير لو بصيت كويس يمكن لابس نظارة شمس ^^ ههههههه

اقوم انا بأة كفايه نوم كده :)

صمت المشاعر يقول...

جميل اووي ان الواحد يتفرج علي الفيلم وبعد ما يتفرج يقول ياتري انا خرجت بايه من القيلم دا

حلوه قصه الفيلم ده الافلام الاجنيبي او الهندي عموما بيبقي فيها اهداف كويسه كتير اما الافلام العربي قليل جدا لو طلعت منها بحاجه مفيده


دمت بكل خير اخي الكريم

اللى موش عارف يتغير يقول...

قلب ارهقته الاحلام

على فكرة ازاى الاحلام ترهق القلب بالعكس القلب بينبض بالاحلام

شكرا على زيارتك الجميلة
انا على فكرة موش لابس نظارة وشايف كل الناس كويسين وحلوين وطعمين ولو لاحظت هتلاقينى كاتب موضوع عن الحب

اللى موش عارف يتغير يقول...

صمت المشاعر

الافلام رغم ان هى افلام وحبشتكنات بس برده بتأثر فى الواحد

الناس الأمريكان دول بالذات بيعملوا افلام فظيعة وعلى فكرة مبحبش قوى افلام الاكشن

حلم بيعافر يقول...

طبعا 4 جوايز اوسكار مش من فراغ
الفيلم حلو مقدرش اقول حاجة
واجمل مافى الفيلم هو اداء راسل كرو
ساعات الواحد بجد بيتخنق من كل اللى حواليه وبيحاول يهرب جوه عقله
او تقدر تقول مش بيتخنق انما ممكن تكون علاقاته قليلة شوية
وبيبقى فيه صور كتييييييييير غير الحالة اللى الفيلم ده بيتناولها
يعنى مثلا سرعة الادراك وتاخره
مثلا انا ساعات بعرف اللى قدامى هيقول ايه -حرفيا-الكلام بيوصلنى حرفيا
وساعات كلام اللى قدامى بيوصلنى بعدها بمدة
مثلا مرة واحح قاللى ازيك يامحمد وانا رايح اصلى مسمعتوش غير بعد ماعدانى بشوية ومعرفتش ارد عليه ولو رديت ساعتها الناس هتقول مجنون
المهم فيه غلطة فى الفيلم
الفيلم افترض ان اللى بيتفرجوا برضه مرضى نفسيين وعندهم نفس الاوهام والانفصال عن الواقع والدليل فى مشهد فك الشفرة بتاع وزارة الدفاع
لما راسل كرو كان مركز على فك الشفرة ومديها كل اهتمامه ومنفصل تماما تماما عن اللى حواليه كان فيه مشهد وراه
المشهد اللى وراه ده المفروض انه من اوهام المريض النفسى اللى الفيلم بيناقش حالته والمفرض انه يختفى لكن المشهد ماختفاش والادهى بقى انه المشهد رصد تغير الاشخاص الوهميين اللى المفروض اننا كمشاهدين منشوفهومش الامن خلال المريض النفسى
بقى والنبى ده كلام؟
يعنى احنا مجانين برضه؟
على فكرة الحالة دى اتعمل عليها فيلم مصرى اسمه اسف للازعاج بتاع احمد حلمى
وبصراحة اول مرة اشوف فيلم مصرى وفيلم اجنبى اشتغلوا على نفس الفكرة واقول انى استمتعت بالفيلم المصرى اكتر لانه اكتر سهولة وبساطة ووصل لقلبى اكتر اكتر اكتر
بس فيه برضه حاجات فى الفيلم الاجنبى مش هقدر انساها زى
1-مشهد بين بارتشر وبين راسل كرو بارتشر بيقول فيه
العبقرى بيعرف اجابة السؤال قبل ما يتطرح عليه
2-مشهد تسلم راسل كرو جايزة نوبل لما قال
الحب مالوش اسباب منطقية الحب سبب لكل نجاح
---------------------------------
ياريت تشوف اسف ع الازعاج كمان

اللى موش عارف يتغير يقول...

بص يالى بتعافر

كلامك معظمة كويس الا فى نقطة اسف عالازعاج الفيلم ده جميل بس واضح ان هم واخدين الفكرة موش بس كده
حتى الاغانى اللى فى الفيلم اللى كانوا بيشغلوها فى الكازينو اغانى اجنبية عدا طبعا اغنية الفيلم الرائعة للرائعة شيرين

عموما هو انجاز ان فيه اتنين من البنية يعرفوا راسل كرو وفيلمه ده

وكيلة نيابه مع ايقاف التنفيذ يقول...

انا بحب جدا الافلام الاجنبيه لان دايما بخرج منه بحاجه مفيده جدا فى حياتنا
بس ياخساره مشفتش الفيلم ده
عموما واضح انه جميل اوى اما مسأله الوفاء دى للاسف بقت من النوادر دلوقتى
ربنا يرزقنا دايما بالناس الاوفياء يارب

اللى موش عارف يتغير يقول...

سيدة الوكيلة مع الايقاف

اولا ربنا يكرمك ويرفعوا عنك الايقاف وتلحقى ماتش الجزائر الجاى

ثانيا الفيلم ده جامد حاولى تشوفيه انا دخلت مدونتك استنتجت انك لو شوفتى الفيلم ده هيعجبك

مسدس صغير يقول...

على فكرة انا كنت علقت على البوست ده قبل كده
وجيت اطل على تعليقى ملقيتهوش
ماشى ماشى
ههههههه
ع العموم مليش فى الالمانى
ههههههههه
حلو الحب وحلو البوست
اخيرا حد من البلاد دى بقى يفهم.

قلم رصاص يقول...

السلام عليكم ورحمة الله وبركاته


زعلان منك جدااااااااا

هي الغربة خلتك تاخد الحكمة من الافلام الأمريكية ولا ايه ياعم اللي موش ناوي بقى تتغير

انت طبعا عارف ان ابن عمتك مكانش حد غاوي ومتابع ومتمكن من الافلام الأمريكية زيه ..ودي بشهادتك برضه

وبرضه تعرف ان انت نفسك مكنتش غاوي ولابتحب تشوف الافلام الاجنبي على الاطلاق
..قال راسل كرو قال ،ولاحتى ريتشارد جير، وليكن حتى تومي لي جونس ولا العبقري دينزل واشنطن والمخضرم جيني هاكمان اللي ملوش حل ولاقطع غيار ههههههههههههههه

وممكن ننتقل الى ساحة الفن والعبقرية السينمائية العالمية ونجيب سيرة الفلتة الأمريكي من أصل بريطاني شون كونري !

كل ده كلام فارغ أو اعتبره أصبح فارغ وسيبك من الماضي

ومتجادلش يا أخ علي
هههههههههههههههه

تقوم تدور الأيام والغاوي يتغير ومعادش يتابع ودي لحكمة طبعا يعلمها سبحانه وتعالى

ونفس الأيام تخليك انت تقرب من الكلام الفارغ ده

وهقولك كلام فارغ ليه
مش عشان هقولك حرام وحلال والكلام ده لأن الكلام في المنطقة دي مطاط وفيه جدال كبير

لأن ، أنا هقولك حاجة تانية ، وهي انه الحكمة يوم ماتيجي تاخدها متاخدهاش من حد مسلم ياباشا..جي تاخدها من فيلم معظم القائمين على صناعته وصناعة صناعته يهود ونصارى
اللي القرآن قالنا عليهم انهم عمرهم ماهيرضوا عننا ابدااااا حتى نتبع ملتهم

أرجو الا تستخف بوجهة نظري

بقى بدل ما الاقيك بتعجب مثلا بتجربة حد مسلم حديث العهد مش شرط ياسيدي من أيام الرسول والصحابة مع ان فترة الرسول والصحابة كان فيها مايشرف الاسلام الاستشهاد به على أمد الدهر الى ان يرث الله الأرض ومن عليها..وعلى رأسهم بعد الرسول ، سيدناعمر رضى الله عنه اللي كانت مواقفه تعتبر دروس في فن الحياة.

مش هقولك كده ، هقولك ياحبيب قلبي خد مثلا العالم الجليل أحمد زويل واهو راجل مصري ومسلم وواجه في حياته صعوبات جمه محدش يقدر يتحملها اولها الظلم داخل بلده وراح نجح بره بلده والعالم كله احترمه لدرجة ان الرئيس أوباما بتاع امريكا عينه مستشارا علميا له.

المهم

نيجي بقى لحتة تانية تضحك في كلامك يابوب هههههههههههههه

بقى انت بتتمنى زوجة زي اللي موجودة في الفيلم .. بدل ماتتمنى زوجة صالحة

انت يابني اتهبلت في عقلك ولا حاجة..دي الزوجة اللي تتمناها وتقول لربنا عليها شكرا..اخص عليك

انت ناسي ان القرآن بيقولنا فيما معناه :" أمة مسلمة خير من مشركة ولو أعجبتكم "

عندك رد بقى على الحتة اللي فاتت دي

معتقدش انك هتجادلني في دي

يا اخي انت عارف مين الممثلة اللي قامت بدور ستنا مريم العذراء في فيلم المسيح اللي اخرجه ميل جيبسون

عااااااااااارف مييييييييييين؟

بكل أسف اللي قامت بدورها احدى عاهرات السينما العالمية والعياذبالله
الأمريكية من أصل ايطالي مونيكا بيلوسي

واحدة زي دي تقوم بدور أشرف نساء الأرض .. وانت جي تتمنى زوجتك تكون شبه واحدة في فيلم أمريكي وتقول لربنا عليها شكرا
ههههههههههههههههههه

بجد والله زعلان منك واتصدمت من البوست ده حقيقي

وانا كنت فكرت ان الغربة تبعدك عن الجو ده وتقريبك أكتر لربنا ويكون كل اسشتهاداتك بناس مسلمين حتى يا اخي لو ظروفهم الحالية مخلياهم في مذبلة التاريخ

مش مشكلة ما احنا كنا زمان اعلم اهل الأرض في كل الميادين والناس دي كلها كانوا بيتعلموا مننا

والرياضة اللي سيادتك بتتكلم عن العالم بتاعها اللي في الفيلم الأمريكي ده .. الرياضة دي وانت تعرف والدنيا كلها تعرف أصولها كلهاااااااا اسلامية تعود للعلماء المسلمين وعلى رأسهم الخوارزمي ...لدرجة ان فيه فروع فيها اسمها في العالم كله اسمها خوارزميات

معلهش متزعلش مني ومن رأيي
بس ده عشان انا بحبك وعاوز مصلحتك

انا عارف برضه انك معملتش جريمة ياعم والله والموضوع بسيط

لكن الحوار ده ماهو الا خلاف في وجهات النظر

واديك شافني اهه كواحد من الناس وانت تعرفه كويس ، غير فكره ومعادش متابع الحاجات دي اللي كان شبه مدمنها والحمدلله ده من نعم ربنا علي

فالرجوع للحق فضيلة

معلهش طولللللللت جدا عليك
بس معلهش انا اتخدت من البوست شوية
وزعلت منك فكان لازم اقولك رأيي المتواضع

أتمنى لك التوفيق

وادعيلي المادتين اللي لسه يعدوا على خير

وربنا يوفقك واتمنى لك التوفيق من كل قلبي

في حفظ الله

اللى موش عارف يتغير يقول...

حبيب قلبى اللى هيبقى باشا (المسدس )
اولا مبروك
ثانيا تعليقك الاول معجبنيش قومت ماسحه
هههههههههههههههه

والله انت اللى حاجة تشرف

اللى موش عارف يتغير يقول...

عمى وعم عيالى سيادة القلم

مكبر الموضوع ليه بس البنت مزة وعجبتنى اعمل ايه يعنى
وبعدين هم زى ما استفادوا منا زمان وانتشلناهم فى عصرهم المتخلف عصر الظلمات ايه المشكلة ان احنا نستفيد منهم
انا قصدى لو واحدة زى دى فى اخلاصها فقط

انا واخد الامر ببساطة مجرد فن بستمتع بيه ليس الا

عموما كالعادة هسمع كلامك وهشوفك هشوفك

والله واحشنى وواحشنى ماتشاتك
السلام امانة للجميع كل احدا بأسمه