السبت، 22 نوفمبر 2008

هو لسه حد بيشجع الزمالك


طبعا الاهلى فى كل حته عمال يجيب اجوان
زى ماراح افريقيا هيروح للمرة التالتة اليابان
واحد اهلاوى هيقولى انت زملكاوى حاقد ومحدش بيقدر عالزملكاوية فى الكلام انا كزملكاوى هزعل واقول دكوا هم هو الاهلى ده بيكسب الا بالحكام وبعدين ده موش الاهلى ده الاسماعيلى هيرد اهلاوى تانى هو الزمالك ده فريق دول لعيبه بارده هو لسه حد بيشجع الزمالك
عايزين نكون احسن من كده الاهلى والزمالك اندية جماهيرية عملاقه واكبر ناديين فى افريقيا والشرق الاوسط وممكن فى العالم
بس لازم ناكد على بعض النقاط الهامة :
1- انا كزملكاوى ايه اللى يخلينى اشجع الاهلى وهو كان بيلاعب القطن
مثلا
الرد بسيط جدا انا ليه حبايب وقرايب اهلاوية وهيزعلوا قوى لو الاهلى اتغلب وهيفرحوا لو كسب يبقى ليه مشجعش الاهلى
2- اللى بيفضلوا يقولوا دول لاعيبه بارده ودول لاعيبه سخنة هى موش كده خالص لان دول هم دول الاعب بيبقى رايح الزمالك فجاه نلاقيه فى الاهلى يعنى مثلا ابراهيم سعيد اسلام الشاطر محمد صديق حسام وابراهيم حسن طارق السعيد اينو ومن قبلهم جمال عبد الحميد ومجدى طلبة وغيرهم دول لعيبه سخنه ولا بارده كلهم زى بعض
3- الاداره نفس الناس متقولش فاشلة او ناجحه لان الفصيلة واحده صدقونى زيد زى عبيد والناس اللى شغالين ادارة محترفه وشغلهم بروفيشنال
طيب ادارة التسويق فى الاهلى اللى بيمجدوها بتجيب لاعيبه بالملايين سوقت مين من لاعبين الاهلى ولعب فى نادى كبير او جاب فلوس زى عمرو زكى اللى من غير ادارة ولا تخطيط جاب ملايين وهيجيب كمان غير مالزملكاوية طالعين بيه السما
4-المهم بقى هو لسه حد بيشجع الزمالك اه طبعا لازم الواحد يشجع فريقة حتى لو بيتغلب كل يوم فيه مشجعين لفرق لم تحصل على بطولات طوال تاريخها افى مصر مثلا اكثر المشجعين تعصبا لفريقهم هم مشجعين النادى المصرى وهو لم يحصل الا على بطولة واحده طوال تاريخه وهى كاس مصر وفى انجلترا مثلا نلاقى جماهير عريضة لفرق تصارع على الهبوط كل سنة
واحد يقولى فرق المقاطعات بس يعنى اللى من منشستريشجع منشسترواللى من ويجان يشجع ويجن واللى من بورسعيد يشجع المصرى
لا يا حبيبى فيه جماهير جماهير كبيره لفريق فولهام اللندنى اللى نفس المدينة ارسنال وتشيلسى وتوتنام وفيه ناس بتشجع اسبانيول اللى فى نفس مدينة برشلونه
موش عارف الناس عايزه ايه يعنى مصر كلها تشجع الاهلى وخلاص ونفضها ولا كل واحد يساند ويشجع فريقه موش كده ولا ايه ......

هناك 6 تعليقات:

مسدس صغير يقول...

هههههههههههههههههه لحد امتى هتفضلو حاقدين على الاهلى كده . ع العموم ربنا يفك زنقتكو .. ههههههههههه تقبل تحياتى يا حبيبى الغالى اللى موش عارف تتغير واوعى تغير المحطه

اللى موش عارف يتغير يقول...

ردك يبين و يؤكد كلامى لحد كبير
يظهر مدى انحدار فكر المشجع الاهلاوى المصرى
حقد ايه اللى جاى تقول عليه
هو فين ده دا انا بعتبر ان كونى موش اهلاوى .. نعمه كبيره
والحمد لله رب العالمين
يا مسدس ميه
22 نوفمبر, 2008 07:19 م

قلم رصاص يقول...

رأيك سليم ياواد والله
بس بسسسسسسسسس بسسسسسسسسسسسسسسسسس

بس مفيش فايدة

هنفضل حديد وانتو صفيح
ههههههههههههههههههههههههه

لعلمك انا مش متعصب ولا حاجة الحمدلله
بالعكس دا انا بحب الوسطية..بس دايا الواقع مر هههههههههههههههههه

وبعدين الزملكاوي عنده احقاد دفينه للأهلاوي لسبب بسيط .. وهو نجاح الأهلي بشكل مستمر وفشل الزمالك بشكل أكثر استمراريه ولا شغال يوينيفرسال في زمانه

ههههههههههههههههههه

واقسم بالله الزملكاوي بشكل عام معذور ..لأنه الأهلاوي او اي مشجع غيره لو مكانه هيكون له نفس العذر

وعلى رأي المسدس الميه هههههههههههه ربنا يفك زنقتكم .. اللي احنا عبرنا اسهل من امكانية حلها
هههههههههههههههههههه

سعد زغلول : مفيش فايدة

تقبل مروري بدون حساسيات وضغائن ونفساويات والذي منه
هههههههههههههههههههههه

اللى موش عارف يتغير يقول...

واضح فعلا ان مافيش فايده
انا بحكى فى ايه ومسدس بيه وقلم باشا بيحكوا فى ايه
حرام عليكم انتم هتخلونى فعلا اتغير
ههههههههههههههههه

انا عايز اوصل للنقاط اللى انا اتكلمت عنها موش هعيد الكلام ياناس

قلم رصاص يقول...

ههههههههههههههههههههه

يابني ما احنا كل هدفنا والله انك تتغير
ههههههههههههههههههههه

وصدقني فكرتك واصله بس احنا بنهرج معاك

وربنا يهدينا جميعا ونبعد عن التعصب الكروي اللي ملوش لازمة

تقبل تحياتي

just dream يقول...

هههههههههههه انا اول ماشفت اسم البوست قلت ده فيه حد بيشتم الزملكاويه واحنا قاعدين بس لقيت العكس
بس على فكره اغلب الزملكازيه قلوبهم زى لون الزى بتاعهم ابييييييض على عكس ناس تانيه
وبعدين انا كان لازم اكون زملكاويه علشان يبقى عندنا ف البيت اتنين زمالك واتنين اهلى ومحدش احسن من حد
حقيقى بحييك على البوست ده